Меркел од Лукашенко побара да дозволи помош од ОН и Еврокомисијата за мигрантите на границата
Германската канцеларка Ангела Меркел денеска повторно разговарала со белорускиот претседател Александар Лукашенко, и од него побарала да дозволи помош од Обединетите нации и Европската комисија за мигрантите на границата со Полска.
– Канцеларката Меркел повторно разговараше со Лукашенко. Таа ја истакна потребата од хуманитарна помош и инфраструктура за репатријација на погодените луѓе, со поддршка на Високиот комесаријат за бегалци на Обединетите нации, Меѓународната организација за миграција и Европската комисија, напиша на Твитер нејзиниот портпарол, Штефен Зајберт.
Kanzlerin #Merkel hat erneut mit Herrn Lukaschenko telefoniert. Sie unterstrich die Notwendigkeit, mit Unterstützung von @UNHCR und @UNmigration und in Zusammenarbeit mit der @EU_Commission für die humanitäre Versorgung und Rückkehrmöglichkeiten der betroffenen Menschen zu sorgen
— Steffen Seibert (@RegSprecher) November 17, 2021
Ниту во изјавата по последниот телефонски разговор меѓу двајцата лидери, Зајберт не се реферираше на Лукашенко како на претседател на Белорусија. Германија и западните земји не ја признаваат неговата победа на изборите во август минатата година, за кои опозицијата тврди дека биле украдени, што предизвика повеќемесечни протести кои беа насилно задушени.
Белорусија соопшти дека лидерите „постигнале разбирање“ во разговорите.
– Со деталниот разговор за бегалското прашање, двете страни постигнаа одредено разбирање за понатамошна акција во решавањето на постоечките прашања, рече Лукашенко, пренесува белоруската новинска агенција Белта.
Лукашенко и Меркел, исто така, се согласија дека претставниците на Европската унија ќе разговараат со нивните белоруски колеги што е можно поскоро.
Извор: МИА