Меркел најави нови мерки бројот на новозаразени продолжи да расте
Германската канцеларка Ангела Меркел денеска најави нови рестриктивни мерки доколку бројот на новозаразени со Ковид-19, што е во пораст, не се стабилизира за десет дена.
– Престојните денови и недели ќе одлучат за ставот на Германија во однос на пандемијата оваа зима, истакна Меркел.
Таа на прес-конференција повтори дека е важно да се носат маски, да се почитува физичката дистанца и да се проветруваат просториите.
Меркел денеска преку видео конференција разговараше и со градоначалниците на 11 најголеми германски градови како да го забават ширењето на новиот коронавирус.
Германскиот Центар за контрола на болестите денеска соопшти дека во изминатите 24 часа пријавени се 4.516 новозаболени луѓе.
Поради раст на бројот на инфицирани лица во големите германски градови, како што се Берлин и Франкфурт воведен е полициски час за угостителските објекти и рестрикција на социјалните контакти.
Во Германија досега 314.660 луѓе се инфицирале со Ковид-19, од кои починале 9.589 луѓе.