Светскиот ланец на ресторани за брза храна „Мекдоналдс“ вечерва ги затвора своите ресторани во Босна и Херцеговина и престанува да работи во земјата, јавија локалните медиуми.

Според информациите, глобалната компанија ги затвора петте ресторани во Сараево и Мостар поради проблеми со франшизата. Со слично објаснување, мултинационалниот гигант го објасни и заминувањето од Македонија пред девет и пол години, во мај 2013 година.

За дел од босанските медиуми, одлуката претставува изненадување, бидејќи „Мекдоналдс“ овој месец го реновираше ресторанот во сараевската населба Неџариќи, со целосно нов концепт и дизајн.

Првиот ресторан на „Мекдоналдс“ во БиХ беше отворен во јули 2011 година, со што земјата тогаш стана 118-тата држава во која се отворени популарните ресторани за брза храна.

Во моментов, „Мекдоналдс“ има преку 38.000 ресторани во над 100 земји ширум светот.