Мегароман: „Сфинга на гневот“ од Жарко Кујунџиски
Издавачката куќа „Антолог“ го објави романот „Сфинга на гневот“ од Жарко Кујунџиски. Според рецензентката Елена Конеска, по романите „Спектатор“ и „Америка“, како и низа поетски збирки и збирки раскази, одговорно е да се очекува и воопшто не изненадува фактот што од писателското перо на Кујунџиски се појави мегароман, каков што е „Сфинга на гневот“.
– Не е нескромно да се каже дека поновата македонската книжевност, речиси, и да не познава роман напишан со толкава опсежност во историско-митолошките истражувачки практики, кои, пак, служат како цврст темел за сместување и за подигнување на носечката приказна на романот. Оваа база на која стапнуваш уште од првите страници и продолжуваш да се движиш по неа до крајот на романот, те вооружува со сигурност и доверба да чекориш низ авантурите, мистериите и пресвртите што следат понатаму до самата разрешница на околу триста страници неизвесност – напиша Конеска.
Романот „Сфинга на гневот“ од Жарко Кујунџиски, според писателот Владимир Јанковски, е „комбинација од трилер и книжевна мистификација, со фина нота на љубов и верба во литературата. И еден лик занесеник по книги, речиси невозможен ендемичен вид во изумирање. Нетипично дело во контекст на македонската романескна продукција во последните години, книга која и тематски и жанровски излегува и од досегашното прозно творештво на Кујунџиски“.
(Текстот е објавен во „Културен печат“ број 53, во печатеното издание на „Слободен печат“ на 17-18 октомври 2020)