Меган Маркл откри дека летово доживеала траума: Војвотката со болка и тага раскажа дека претрпела спонтан абортус
Војвотката од Сасекс, Меган Маркл, призна дека имала спонтан абортус во текот на летото и откри за чувството на „скоро неподнослива тага“.
„Знаев, додека го гушкав своето првородено дете, дека го губам второто“, напиша Маркл за „New York Times“.
Маркл рече дека го загубила своето второ дете откако едно утро во јули оваа година, неочекувано почувствувала „остар грч“. Неколку часа подоцна, од болничкиот кревет гледала како се крши срцето на нејзиниот сопруг додека се обидувал некако да ја утеши.
Опишувајќи го трагичниот момент кога сфатила дека „нешто не е како што треба“, таа напиша: „Откако му ја сменив пеланата на Арчи, почувствував остар грч. Паднав на подот со него во рацете, потпевнувајќи приспивна песна за да нè смири двајцата, весела мелодија како силен контраст на моето чувство дека нешто не е како што треба“.
Меган Маркл е првиот (неофицијален) член на британското кралско семејство која ја опиша „неподносливата тага“ и отворено прозборе за абортус. Меган и принцот Хари го добија своето прво дете Арчи на 6 мај 2019 година.