Пејачката Мајли Сајрус јавно се побуни против сексистичкиот коментар кој директорот на MTV ѝ го упатил во текот на неодамнешниот настап.

„Барав да ги исклучат таканаречените „бјути светла“, бидејќи никогаш не би се вклучиле доколку настапува некој маж. Не се работи ни за тоа, едноставно не ми беа потребни затоа што не го замислував така мојот настап. Директорот на MTV тогаш ми рече дека ќе ме третира како маж“, изјави Мајли за „Joe Rogan Experience“.

Потоа пејачката во текот на настапот имала мала незгода и сакала да почне со настапот од почеток, а тогаш дошло до конфликт меѓу неа и директорот.

„Се изнервирав зашто алките ми се заплеткаа во костимот и ми беше тешко да се движам, затоа сакав да повториме, а директорот ми рече дека такво нешто никогаш не би му се случило на маж и дека ако сакам да ме третираат како маж, тогаш мора да го прават тоа цело време, а не само кога мене ми одговара“, рече пејачката.

Мајли му одговорила во свој стил.

„Маж никогаш не би имал ваков настап затоа што не е должен да се соблекува гол и да го подигнува рејтингот на вашата програма“.