Маж од Камбоџа останал цели четири дена заробен во пештера, откако доживеал несреќа собирајќи измет од лилјаци, пренесуваат британските медиум.

Како што пренесува Би-Би-Си, 28-годишниот Сум Бора кој пропаднал меѓу две карпи во пештерата во неделата, откако се вратил по неговиот факел, сега е спасен и е пренесен во болница.

Семејството набргу откако исчезнал почнало да го бара и го пронашле дури во вторникот, кога веќе неколку дена бил без храна и вода.

По десетчасовната операција за спасување во која учествувале околу 200 спасувачи, тој бил успешно ослободен во средата и сега се лекува во локална болница.

Којун Сотеја, сопруга на Бора, изјави дека се лекува во болницата поради повреди на главата, коленото и градите. Таа му се заблагодари на премиерот на Камбоџа, Хун Сен, кој испрати тим за спасување и донираше 2.500 американски долари на нивното семејство.

Изметот на лилјаците, познат како гуано, често се користи како ѓубриво и постигнува добра цена во Камбоџа.