Матијашевиќ: Конечно немаме повредени, да бидеме позитивни на ЕП!
Нашата репрезентација оствари голема победа над Бугарија со 3:0 (25:23, 25:21 и 25:19) и го освои третото место на 43-тото издание на традиционалниот меморијален турнир „Бранко Хаџииљоски – Чајка”.
Селекторот Никола Матијашевиќ вели дека турнирот „Чајка“ беше добар за неговите одбојкари кои одиграле подобро во однос на претходните контролни мечеви против Шведска и Романија, и против Бугарија имаа уште поголем прогрес во нивната игра.
– Имаме уште да работиме во сите елементи, конечно сите мои играчи се опоравија од своите повреди и имаме доволно време да се поправиме во некои сегменти. Одиме со оптимизам во Ст. Полтен за тест дуелите со Австрија и потоа за Европското првенство и групната фаза во Љубљана. Ќе играме против Финска, Турција, бранителот на титулата Русија, Белорусија и Словенија, но мораме да размислуваме позитивно – рече Матијашевиќ, стратегот на нашата селекција.
Дебитантскиот настап „црвено-жолтите“ на континенталните собири ќе го имаат на 12 септември во арената „Стожице“ против репрезентацијата на Финска.