Мартин: Ѓоковиќ игра подобро од кој било во историјата!
Според легендарниот американски тенисер, Србинот е цврст како „ѕид од цигли“ во најтешките моменти…
Приказната околу „големата тројка“ и за тоа кој е најдобар тенисер на сите времиња ќе трае и кога ќе ја завршат професионалната кариера, освен доколку не се појави ново „чудо“ на терените.
Едноставно, Новак Ѓоковиќ, Рафаел Надал и Рожер Федерер се шампиони во најдобрата ера која тенисот ја имаше и која ќе ја има во иднина.
Според легендарниот американски тенисер Тод Мартин има пофални зборови за првиот светски рекет Ѓоковиќ.
– Играта на Федерер е естетски најпривлечна во историјата. Ја одушевува публиката со сервисот, со својот ритерн, во нападот и одбраната, сето тоа што го прави на теренот е преубаво. Но, доколку е во права форма, Ѓоковиќ според мене е човекот кој најтешко може да биде совладан. Доколку се чувствува пријатно, доколку има самодоверба и физичка форма кои му дозволуваат да биде концентриран, неговата игра е подобра од која било друга. Атлетски е неверојатен, како да „не е од овој свет“. Моето мислење е дека Ѓоковиќ тенисот го игра подобро од кој било во историјата. Соработував со него и знам каков менталитет има. Цврст е како „ѕид од цигли“ во најтешките моменти – рече Мартин.
Тод Мартин во 1994 година играше финале на „Австралија опен“ и претрпе пораз од Пит Сампрас (САД) со 3:0 во сетови, а пет години подоцна со 3:2 во завршната борба за трофејот на „УС Опен“ загуби од Американецот Андре Агаси.