Непосредно пред новата натпреварувачка сезона 2020/21, беа промовирани нови засилувања во редовите на прволигашкот Академија Пандев.

Нови „пандевци“ се Кире Маркоски и Кристијан Трапановски, двајцата крилни напаѓачи доаѓаат како големи засилувања и за првпат позираат во домашниот и гостинскиот дрес за новата сезона.

Маркоски е сениорски репрезентативец на Македонија и доаѓа од екипата на Карвина (Чешка). Освен за тимот на Карвина, 25-годишниот крилен фудбалер во својата кариера има настапувано и за екипите на АЕЛ Лимасол, Спартак Трнава, Работнички и Македонија ЃП.

Трапановски е младински репрезентативец на Македонија и е повратник во тимот на Академија Пандев.

20-годишниот Кико е првиот играч со трансфер од Академија Пандев во некој европски клуб, односно во тимот на Славија Прага. Во својата кариера уште има настапувано и за тимовите на Татран Прешов, Викторија Жишков и Подбрезова.

Потсетување, играчите на тренерот Александар Таневски првиот меч во шампионатот ќе го имаат в недела (9. август) на стадионот „Тумбе Кафе“ во Битола против Пелистер (17.30 часот). Главен судија на овој дуел е Игор Стојчевски од Скопје.