Малта е првиот противник на македонската А репрезентација во квалификациите за пласман на Европското првенство 2024.

Овој натпревар ќе се игра в четврток од 20.45 часот на Националната арена „Тодор Проески“ – Скопје, а главен судија ќе биде Кристо Товер од Естонија.

Селекторот на Малта, Микеле Марколини вели дека неговите играчи се наоѓаат во една многу тешка група заедно со Италија, Англија, Украина и Македонија.

– Знаеме дека натпреварот со Македонија ќе биде тежок, всушност ова е тешка група, но ние ќе го дадеме максимумот. Малта е мала земја и ние ќе ги почитуваме нашите противници, но фудбалот се игра на теренот и сè може да се случи. Многу сум среќен од напорите и посветеноста на играчите во изминатите денови и со нетрпение очекувам да ја започнеме оваа нова авантура заедно со нив. Фудбалерите мора да играат, да бидат храбри и без страв да се соочат со ривалите – вели Марколини кој в четврток ќе дебитира на селекторската клупа на Малта.

Еден од најискусните во составот на Малта е 35-годишниот дефанзивец Стив Борг.

– Ќе работиме напорно за да се подготвиме за претстојните осум натпревари. Свесни дека секој меч е предизвик, ние сме целосно фокусирани за утрешната пресметка со Македонија, а потоа ќе размислуваме за Италија – се зборовите на Борг.

Милевски пред натпреварот со Малта: Во денешниот фудбал не постојат фаворити