Министерот за правда, Бојан Маричиќ во емисијата „10 Минути“ на ТВ21 посочи дека процесот на попишување на дијаспората продолжува до 30 септември.

– Операцијата на попишување треба да се случи одеднаш, во континуитет. Ние единствено што имаме во континуитет сега е попишувањето на дијаспората, и тоа е многу важно за дијаспората да се напомене дека тој процес продолжува. Тој процес започна на 1-ви март и ќе продолжи до 30-ти септември, вели Маричиќ.

Тој додава дека во тек е процесот и се задоволни од досегашните бројки на попишани граѓани од дијаспората.

– Теренското попишување треба да започне масовно кај нас тогаш кога ќе се создадат сите услови и кога ќе имаме повисок степен на имунизација, порача Маричиќ.

Исто така, тој посочи дека нема никакво прекршување доколку не започне денеска пописот.

– Постоечкиот закон предвидува пописот да започне на 1-ви и да заврши на 21-ви април, притоа стандародот на Евростат е да трае најмалку 15 дена, а ние сме оставиле во законските рамки 21 ден. Така што и да не започне денеска, и да не започне во првите неколку дена тоа не е никакво прекршување. Важно е да заврши на време, меѓутоа ние сите знаеме дека постои веќе предлог Законот на Владата кој што е доставен во Собранието и со кој што се предвидува да се озложи пописот за септември, од 5-ти до 30-ти, истакна Бојан Маричиќ.

Тој смета дека има поддршка во Собранието за усвојување на овој закон.

– Затоа мислам дека не е воопшто соодветно да започне пописот овие денови, бидејќи како што тоа е голема машинерија од 6.000 попишувачи, што доколку теренски тргне – тешко може да се запре. Тоа се трошоци, постапки за кои треба да видиме што со нив. Вака само пописот се одлага за септември, а подготовките продолжуваат, додава Маричиќ.