Маричиќ на средбата со Јурова: Поддршка за реформите во правосудството и зајакнување на владеењето на правото
Реформите во правосудството, владеењето на правото и европските интеграции на земјата биле во фокусот на денешната средбата на министерот за правда Бојан Маричиќ во Брисел со потпретседателката на Европската комисија за транспарентност и вредности Вера Јурова.
Маричиќ, како што информираат од неговиот кабинет, на средбата посочил дека владеењето на правото е основа за развој на сите држави, па затоа и земјите кандидатки за членство во Унијата треба да бидат вклучени во постојниот механизам за владеење на правото во земјите членки на ЕУ.
На Јурова, Маричиќ ѝ ја пренел одлучноста на Влада да продолжи со европската агенда и дека земјава со засилено темпо ќе продолжи да ги спроведува реформите со цел носење на европските стандарди дома, а тоа е и главната причина за носењето и спроведувањето на планот „Европа дома“.
На средбата со Јурова, Маричиќ, исто така, ѝ го образложи и планот за дигитализација на македонското судство на кое Министерството за правда работи интензивно. Дигитализацијата и онлајн судењата, според Маричиќ ќе обезбедат побрзи постапки и континуитет на истите.