Манчестер јунајтед ја одреди цената за Пол Погба
Францускиот интернационалец Пол Погба, кој моментно со репрезентацијата настапува на Европското првенство, би можел да го напушти Манчестер јунајтед ова лето.
Погба веќе некое време се поврзува со трансфер во неговиот поранешен клуб Јувентус. „Старата дама“ е заинтересирана за играчот од средниот ред, но нема да биде лесно да се добие неговиот потпис.
Имено, Јунајтед ја одреди цената за Погба и бара околу 80 милиони евра за неговите услуги, без оглед на тоа што неговиот договор истекува следното лето.
Дури се споменува и можност за размена меѓу клубовите, според која Погба би се вратил во Торино, а Кристијано Роналдо во Манчестер, каде што исто така имаше големи успеси.
Што се однесува до Погба, тој често беше критикуван на „Олд Трафорд“, додека за Јуве играше од 2012 до 2016 година и освои четири титули во Серија А.