Македонското лево репрезентативно крило за официјалниот сајт на Европската ракометна федерација (EHF/Amina Idrizi) ги сподели очекувањата во пресрет на континенталниот собир 2020 кој што ќе се одржи во три земји (Австрија, Шведска и Норвешка).

Нашата селекција се наоѓа во групата „Б“ која ќе се игра во Виена, ривали ни се домаќинот Австрија, потоа Чешка и Украина и првопласираните две репрезентации ќе одат во главната фаза.

Првиот меч „црвено-жолтите“ предводени од селекторот Данило Брестовац ќе го имаат на 10. јануари против Украина (20.30 часот), два дена подоцна против Чесите (18.15 часот), а на 14. јануари против Австрија (20.30 часот).

Дејан Манасков, играчот на унгарскиот клуб Веспрем, вели дека постојат добри шанси за учество во вториот круг, а таму ќе се најдат и двете најдобропласирани од групите „А“ и „Ц“. Во „А“ групата се Хрватска, Белорусија, Црна Гора и Србија, а во „Ц“ групата Шпанија, Германија, Летонија и Холандија.

– Ќе учествуваме со помлад состав и на некои од играчите ќе им треба време да се адаптираат во тимот. Сите сме оптимисти и иако првиот впечаток е дека немаме многу тешка група, ќе одиме чекор по чекор и нема да ги потцениме нашите противници. Се надевам, дека со помошта од нашите навивачи, ќе се најде на една од првите две позиции во групата – вели Манасков за сајтот на ЕХФ.