За да се зајакне борбата против корупцијата треба да се зајакне позицијата на Државната комсиија за борба со корупцијата, да се прифаќаат нејзините препораки и предлози, а не да се формираат параинституции за кои не се знае ниту каква функција ниту какви ингеренции имаат – вели за „Слободен печат“ поранешниот прв антикорупционер Драган Малиновски.

– Еве, Владата решила да креира позиција „вицепремиер за борба против корупцијата“, но е нејасно каде е Николовски во системот на постапувања и надлежности. Се е тоа импровизација, а во меѓувреме се игнорира она што го имаме како постоечки капацитет – ДКСК. Наместо да ги јакнеме институциите што ги имаме, создаваме некој вид на пара-тела, пара-институции и тука е нашиот проблем – вели Малиновски.

Поранешниот претседател на ДКСК вели дека неспроведувањето на препораките е сериозен проблем и постои голем отпор за промена.

– За да оствариме прогрес треба да се почитуваат препораките на ДКСК и да бидат високо поставени во агендата на државата. Токму ДКСК е телото кое има компетенција и капацитет за да процени дали е нешто согласно антикорупциските политики. Но, кај нас се оди на компензирање при постапувањето по препораките и од самиот почеток има сериозен отпор кај институциите да ја „послушаат“ ДКСК – вели Малиновски.