Можеби сте љубител на полнети тестенини, но се откажувате секојпат кога и да посакате да ги зготвите, од причина што е тешко да се подготват во домашни услови. Едноставно кога ќе помислите на здодевното полнење со лажица, наместо да уживате во полнети канелони, школки и сл., вие избирате друг оброк. Но, всушност, ако ги имате соодветните алатки, полнењето тестенини може да биде многу едноставно.

Наместо со лажица, виљушка, нож или кој било друг прибор да го туркате филот во канелоните, равиолите или тортелините, ќе ги наполните со вкусен фил со помош на кујнски шприц и тоа оној со платнена вреќичка. Ако немате таква алатка, земете ќесичка за замрзнување храна.

Ставете ја ќесичката во висока чаша, отворете ја и полнете ја со фил. Потоа подигнете ја, притиснете филот да се спушти кон долниот дел и со ножици исечете го едниот крај од ќесичката, за да направите отвор низ кој ќе истекува филот. Потоа земајте од тестенините и полнете ги со вкусниот фил. Готовите канелони наредете ги на чинија, па откако ќе ги наполните, сите наредете ги во соодветен сад за печење. Откако ќе се испечат, ќе имате вкусен оброк подготвен со малку труд.