Дводелниот костим за капење се појавил дури во 1946 година во модната престолнина Париз. Бил дизајниран од францускиот моден креатор Луј Реар, кој го вовел зборот бикини преземен од атолот Бикини во Тихиот Океан, каде што се спроведувале нуклеарни тестови, а истата година се случиле и нуклеарни експлозии што го шокирале светот.

Бикините на Реар биле исто толкав шок, па продажба немало. Реар едвај успеал да најде модел за рекламирање на својот моден производ. Најпосле ја ангажирал танчерката и стриптизерка Мишелин Бернардини, која набргу станала ѕвезда. Сепак, бикините биле строго забранети од Ватикан и прогласени за грешни.

Во 1951 година, бикините се појавиле на телата на 27 мисици кои учествувале на првиот избор за Мис на светот во Лондон.

Работите во полза на бикините значително се смениле кога во 1956 година глумицата Брижит Бардо ги носела во филмот „И Бог ја создал жената“. Широко прифатени станале на почетокот на 60-те години, откако отворено почнало да се зборува за женската сексуалност и контрацепцијата. Историски миг за дводелните костими за капење бил кога Урсула Андрес се појавила во бикини во филмот „Доктор Но“, во 1962 година.