Макрон: Не е нужно соседите да бидат идни членки на ЕУ
Францускиот претседател, Емануел Макрон во првото обраќање пред јавноста откако ги блокираше преговорите со Македонија и Албанија вчера, порача дека полноправното членство на ЕУ не треба повеќе да биде единствената политика кон земјите од „соседството“ на ЕУ, доведувајќи ја за прв пат јавно во прашање европската иднина и перспектива на земјите од западниот Балкан дадена во Солун во 2003.
– Разговаравме за визијата на секој од нас за Европа, јас не сметам дека проширувањето е единствената политичка реалност за соседството, изјави Макрон и додаде дека ЕУ не функционира ваква каква што е во моментот.
Тој истакна дека со „овие земји” треба да се има „стратешка агенда”, но дека не е нужно тие да бидат идни земји членки на ЕУ.
Макрон ја повтори потребата за реформа на процесот на преговори со земјите-кандидати и побара тој да биде реверзибилен, односно да може да биде стопиран.
Францускиот претседател посебно ги поздрави напорите на премиерот Зоран Заев за Преспанскиот договор и за уставните измени.
– Тие измени беа дел од барањата на ЕУ, но повеќе земји имаа резерви, не затоа што нема напредок, напредок има, но има некохерентности, помеѓу другото во однос на миграцијата и почитувањето на одредени правила, кажа Макрон.