Макрадули: Забрана за увоз не е решение, РДФ не е опасен отпад

Според него, неточни се тврдењата дека е забранет во ЕУ и посочи дека во цементарниците во Шведска и Норвешка РДФ се користи 60-70 отсто.

Со забрана не се решаваат работите во животната средина, туку со регулирање и мониторирање и со интегрирана акција базирана на наука. Ова не е решение, ова е само популизам, рече заменик-министерот за животна средина Јани Макрадули во однос на барањето итно да се изласа закон за забрана на увоз на отпад што се користи како гориво. Предлогот го достави ДОМ, а активисти од движењето „Петоци за иднината” денеска протестираа барајќи тој да се стави на дневен ред во Собранието.

Во гостување во емисијата „Само интервју” на ТВ Канал 5 Макрадули рече дека РДФ што Цементарницата Усје го користи како енергенс не е опасен отпад и не е извор на аерозагадувањето како што се тврди.

-РДФ-от е неопасен отпад кој се добива од различни комбинации на отпад – комунален, индустриски, од текстил, од калта од пречистителни станици… Тие хемиски се обработуваат и се создава алтернативно гориво. Добро е државата да има свој погон што ќе произведува РДФ за да може да го контролира уште повеќе и посигурно. Тоа требаше да го направи Дрисла. За жал, тие не го исполнија договорот и една од обврските за да може од отпадот што го имаме да не се создаваат купишта, туку да се преработи и тој отпад да го нема, рече Макрадули.

Според него, неточни се тврдењата дека е забранет во ЕУ и посочи дека во цементарниците во Шведска и Норвешка РДФ се користи 60-70 отсто.

-Во Србија е забрането, но не и во Хрватска, Чешка и во Албанија како што велат, рече заменик-министерот. Додаде дека е лицемерно што протестите ги поддржуваат и пратеници од опозицијата затоа што дозволата за да користи РДФ-отпад Цементарница Усје ја добила токму во времето на ВМРО-ДПМНЕ кога МЖСПП им одобрило да увезат 25 илјади тони.

Дозвола за увоз на отпад кој се користи како енергенс имаат цементарницата Усје и ФЕНИ, но минатата година неа ја искористила само Усје. Во 2019 година, како што соопшти Макрадули, Цементарницата увезла 5000 тони РДФ.

Во врска со издвојувањето на камионите на Царина во Гевгелија од кои се земени примероци на отпад не е прв случај и дека Државниот инспекторат за животна средина и другпат правел вонредни контроли. Резултатите од примероците пратени на испитување во лабораторија во Естонија се чекаат за десетина дена.

Макрадули е категоричен дека најголем загадувач на воздухот е затоплувањето во домаќинствата и во јавните институции кои се  греат на нафта, мазут и јаглен или со штетни материи како гуми. Единствено решение за намалување на штетните емисии и ПМ-честички, рече, е промената на начинот на греење и поврзување на гас или на топловодни мрежи.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот