Бројките на увезен отпад во Македонија, околу кои се крена голема фама во јавноста не треба да ги загрижуваат граѓаните, бидејќи како што уверува заменик министерот за животна средина, Јани Макрадули, тој отпад се користи за преработка, а не за депонирање.

– Во 2015 и 2016 година е увезена најголема количина отпад. Сега станува збор каков е тој отпад и дали се користи за нешто? Во Република Северна Македонија не можете да увезете отпад за да го складирате и затоа „Дрисла” никогаш и не добила дозвола за да може да земе од некаде отпад и некаде да го стави. Се увезува отпад единствено за да се преработи. На пример компанијата „Макстил” увезува железо кое потоа 97 отсто го извезува обработениот материјал. Се увезува пластика во компании кои рециклираат, каде пластичните шишиња се прават канчиња за јагоди и ги извезуваат во Италија или прават други продукти. Ве уверувам дека работите одат согласно законите и стандрдите, рече Макрадули.

Тој ги посочи позитивните примери од земјите членки на ЕУ, каде отпадот се преработува.

– Ако зборуваме за алтернативните горива, во Шведска има 31 објект, во земјите членки на ЕУ има скоро 500 објекти кои што од отпадот произведуваат топлинска или електрична енергија. Многу е подобро отпадот да се обработи како алтернативно гориво отколку да се прават купишта од депонии, ќе има помало загадување на почвата и на емисиите на ЦО2.

Макрадули нагласи и дека Македонија повеќе извезува отколку што увезува отпад.

– Сега количините се драстично помали. Повеќе се извезува отколку што се увезува отпад и тоа е многу битно да го знаеме. Република Северна Македонија е дел од еден систем наречен Базелска конвенција, меѓународни ратификации. Ние сме потписници на Договорот за стабилизација и асоцијација. Ги хармонизираме законодавствата и ние не можеме да бидеме надвор од европските стандарди. Ние мораме да изградиме систем на враќање доверба во институциите, рече Макрадули.