„Макфест” годинава ќе се одржува под отворено небо, почна акредитирањето на новинарските екипи
Фестивалот „Макфест” годинава поради здравствените протоколи и мерки за заштита ќе се одржува под отворено небо на Градскиот плоштад „Слобода”, место во салата на Центарот за култура „Ацо Шопов”- Штип, каде што точно 34 години се одржуваше фестивалот.
Шефот на прес-центарот, Драган Ристов вели дека од денеска па до четврток, 17 септември можат да се акредитираат новинари, сниматели и фотографи.
–Заради тоа што фестивалот се реализира под строги безбедносни и здравствени протоколи, согласно одлуките на Министерството за здравство и Владата, Ве инфорираме дека годинава е лимитиран бројот на акредитации за редакциите. Причина за ваквата одлука е да се овозможи што помало движење на луѓе во прес-центарот и да се обезбедат сигурни и безбедносни мерки за заштита од Ковид-19. Организацискиот одбор на фестивалот ќе прави напори новинарите непречено да ја вршат својата работа, но со задолжителни консултации со одговорните од прес-центарот, вели Ристов.
Тој информира дека секоја редакција има право на две акредитации за лицата кои ќе бидат назначени да го следат фестивалот, а годинава се воведени два типа на акредитации, зелена со која ќе се има пристап до сите локации и црвена или со ограничен пристап, присуство во одредени делови.
–Годинава фестивалот се оддржува на отворено, на градскиот плоштад, на 18 и 19 септември. Со цел полесно вршење на вашите новинарски активности, Организацискиот одбор обезбеди и посебно место за прес-центар, веднаш до самата сцена, со цел непречено снимање на изведувачите и земање на изјави, без кршење на здравствените протоколи. Се надевам ќе наидеме на Ваша соработка, со цел да се заштитиме сите од можно непријатни ситуации и кршење на протоколите кои се на штета на сите. Вашите акредитации испратете ги на е-маил адреса [email protected], рече Ристов.
Тој појаснува дека заради безбедност и следење на протоколите, сите контакти и активности на новинарите за време на фестивалските вечери, како што се земање изјави, правење инсерти, фотографирање ќе бидат во договор со лицата задолжени за функционирање на прес-центарот на „Макфест“.
– Драган Ристов – шеф на прес-центар, телефон за контакт 078/472 708 и Трајче Јованов – прес-служба, телефон за контакт 074/609 710. Сите Ваши прашања, слободно упатувајте ги на оваа е-меил адреса или во директен контакт на споменатите телефонски броеви. За време на фестивалот, консултирајте се со споменатите лица со цел непречено и професионално одвивање на фестиваот, но на наша заштита, додаде Ристов.
В среда е најавена прес-конференција, а она што се знае е дека на 18 септември осуммина пејачи ќе ги испеат најзпознатите хитови од „Макфест”. На 19 септември на сцената ќе бидат интерпретирани 24 нови фестивалски песни.