Македонско-бугарската комисија и натаму не може да најде решение за Гоце Делчев и поновата историја
Македонско-бугарската комисија успешно ги затвори поглавјата за предисторијата и античкиот период, но и понатаму се далеку од договор за Гоце Делчев и поновата историја, пренесува 1тв.
Копретседателите на македонско-бугарската комисијата Драги Ѓоргиев и Ангел Димитров, заедно со своите тимови во овие два дена успеале да ги состават и препораките за предисторијата и антиката, кои ќе бидат испратени до двете влади.
Овие препораки се однесуваат за учебниците по историја од 5-то одделение во бугарскиот и 6-то одделение во македонскиот образовен систем.
– Извлечени се местата за средновековието околу кои може да се направат препораки, каде што има најсуштествени разлики. Во следните 2 месеци ќе биде разменета првата драфт верзија на забелешки. Во септември ќе се усвојат и овие препораки, изјави Драги Ѓоргиев, копретседавач со македонско-бугарската експертска комисија.
Сепак најтешкиот дел допрва претстои, а тоа е изнаоѓање на заедничко решение за Гоцел Делчев и поновата историја.
– Не би навлегувал кои се разликите за Гоце Делчев. Има простор да се постигне договор за него – изјави Ѓоргиев.