Македонските ракометарки се враќаат со голема негатива од Букурешт!
Македонската женска сениорска репрезентација денеска во првиот натпревар од баражот за пласман на Светското првенство, во Букурешт загуби убедливо од Романија со 33:22 (15:11).
И пред стартот на овој меч се знаеше дека противникот ја има фаворитската улога и истата беше оправдана на теренот, а за избраничките на селекторот Симе Симовски останува на реваншот во Скопје да се покажат во подобро издание.
Добро започнаа нашите ракометарки од првата минута, двапати израмнија на 2:2 и 3:3, а при негатива од 5:4, противникот направи серија од 7:0.
Успеавме до крајот на првото полувреме нешто да намалиме и на паузата заминеме со „минус четири“ (15:11). И на почетокот од вториот дел добро се држевме резултатски, ривалот имаше само предност од „плус три“ (17:14).
Но, одново се дозволи нова низа на погодоци на противникот, односно серија од 5:0, а подоцна нашата негатива стана и „двоцифрена“.
Како што и се очекуваше Романките беа предводени од нивната најискусна ракометарка Неагу која запиша 11 голови. Во нашите редови најрасположена беше Ристовска со осум погодоци, по пет имаа Јанеска и Стојковска.
Возвратната пресметка ќе се игра четири дена подоцна во истиот термин во СЦ „Јане Сандански“.