Македонските ракометари во вториот дел го скршија отпорот на Финска
Во претпоследниот натпревар од квалификациите за пласман на Европското првенство денеска најдобрата македонска репрезентација славеше на гостувањето кај Финска со резултат 22:27 во „Кокс“ Арената во Рихимаки.
Доста се мачеше составот на Кирил Лазаров до триумфот, ривалот воглавно го контролираше резултатот во своја корист, водеше по првите 30 минути со 14:12.
Најголема заслуга што Финците водеа рамноправна битка против нашата селекција имаше нивниот голман Росландер кој забележа дури 19 одбрани и запре три седмерци.
Во првото полувреме домаќинот двапати имаше и позитива од „плус три“ (12:9, 13:10) што беше загрижувачки за нас. За среќа, во вториот дел беше скршен отпорот, при нерешени 19:19 направивме серија од 5:1 што беше клучно за конечниот епилог.
Кај стрелците Лазаров и Кузмановски имаа по пет погодоци, четири запиша Георгиевски, а на спротивната страна шест голови беа дело на Гранлунд.
И покрај тоа што имаме осум бодови, и натаму не ни е обезбеден настапот на континенталниот собир кој ќе се одржи наредната година во Унгарија и Словачка.
Од 18.30 часот играат Швајцарија и Данска, доколку Данците триумфираат, сигурно ќе чекираме „билет“ за ЕП. Да додадеме уште дека Швајцарците ќе бидат нашите последни ривали во овој квалификациски циклус на 2 мај во СЦ „Јане Сандански“ – Скопје.