Во својот четврти натпревар од Европската златна лига македонската одбојкарска сениорска репрезентација загуби на гостувањето во Шарлоа од Белгија со резултат 3:0 во сетови. Белгијците сите три сета ги добија тесно со два разлика, во првиот беа подобри со 27:25, во вториот со 25:23, а во третиот со 26:24.

Во првиот сет избраниците на селекторот Јошко Миленкоски имаа двапати предност од пет поени (7:2, 8:3), подоцна и одржуваа позитива од „плус три“ (11:8, 15:12, 19:16).

Нашите најдобри одбојкари имаа и неколку сет топки кои не беа искористени, а противникот успеа да казни и поведе со 1:0 во сетови.

Вториот сет донесе доста неизвесност, се играше поен за поен, и двете репрезентации се менуваа во водство. Белгија имаше 4:1, па се вративме со минимална позитива за 10:9, 12:11, а дојдовме во еден момент и до „плус два“ (16:14). При 19:19 Белгија врза два поени, разлика која успешно ја одржуваше до крајот на вториот сет.

Во третиот сет најпрвин Белгија стекна позитива од „плус четири“ (13:9), па нешто намаливме од негативата во следниот период за 17:15 и 18:16. Во финишот можевме да направиме и пресврт откако водевме трипати со 20:22, 21:23 и 22:24, но и овојпат не издржавме до крај, бидејќи ривалот врза четири поени и на крајот ги постави конечните 3:0.

Во нашите редови најефикасен беше Н. Ѓоргиев со 17 поени, 11 имаше А. Љафтов, девет Ф. Савовски, а по шест В. Милев и Ф. Маџунков. На спротивната страна 21 поен беа дело на М. Десмет, а еден помалку имаше Џ. Кокс.

– Мораме да поработиме на концентрацијата, на тие крајни поени од сетовите, подобро да ги решаваме, за да бидат во наша полза – вели македонскиот одбојкарски репрезентативец, Филип Савовски.

Четвртото коло ќе биде комплетирано в недела со дуелот помеѓу Хрватска и Украина. На табелата во групата „Б“ води Украина со девет бодови, пред Белгија со шест, Македонија има пет, а последна е Хрватска со еден.

Следниот дуел нашата селекција ќе го има на 14 јуни на гостински терен против Хрватска.