Македонските Бугари му пишаа на Вархеји: Властите во Северна Македонија не сакаат дијалог
Невладини организации и здруженија на македонските Бугари со писмо бараат средба со еврокомесарот за проширување и соседска политика Оливер Вархеји поради, како што велат, „институционалната омраза и систематската дискриминација кон нив“, објави БГНЕС.
Во писмото тие се жалат дека во нивната земја од локалните и централната власт нема никаква желба за дијалог со нив.
„Секојдневната стигматизација на нашата бугарска заедница и неможноста за воспоставување на дијалог со локалните и централната власт создаваат предизвици за нашата заедница кои што често ги надминуваат нашите индивидуални и колективни можности. Искрено се надеваме дека дијалогот со вас ќе придонесе за намалување на секојдневниот притисок врз нас, граѓаните на Република Северна Македонија кои не се плашиме, и покрај ризикот од дискриминација и јазикот на омраза, отворено да опстојуваме на нашето македонско бугарско наследство и идентитет“, пишува во писмото од македонските Бугари до Вархеји.
На писмото се потпишани 11 претставници на организации и здруженија на македонските Бугари, вклучувајќи ги и претседателите на здруженијата „Иван Михајлов“ од Битола и „Цар Борис Трети“ од Охрид.