Уметникот Ѓоко Ризов речиси половина година живее и твори во Амстердам, Холандија, каде што во 2017 година на холандската публика ѝ се претстави со самостојна изложба. Инаку, Ризов до мај 2021 година работеше во Единицата за економски и компјутерски криминал при МВР, а по напуштањето на службата продолжува активно да се занимава со уметност.

На 31 aвгуст во Њујорк сликарот Ѓоко Ризов беше дел од настанот „Abstraction Have Voices“, каде познатиот композитор и пијанист Маргин Александер од Њујорк изведе неколку оригинални композици инспирирани од уметноста на Ризов и на единаесет други уметници од девет различни земји. Настанот во форма на музичка изложба беше инструментален концерт емитуван во живо преку онлајн-стриминг и беше отворен за сите музички и уметнички љубители.

Претходно, на 21 август, Ризов имаше свој уметнички перформанс под наслов „Reflections and Frames“ во галеријата „Sound Light Color“ во Амстердам, во кој учествуваше и Александра Црвенковски од Виена. Уметничкиот перформанс ги истражува човековите свесни и несвесни тенденции на „користење маски“ и во исто време го категоризира сето она што се случува и постои околу нас.

Прашувајќи се кое е нашето „вистинско лице“ и колку често лицето во огледалото е во спротивност со сликата што му ја прикажуваме на светот, Ѓоко Ризов во својот перформанс преку портрети, огледала и лица, го поставува прашањето: како изгледа среќата, заљубеноста, осаменоста, депресијата или аксиозноста на човековото лице, и дали и колку сме спремни да се спознаеме себеси и другите.