По вчерашната победа во првото коло на ИТФ фјучрс турнирот „М25 Мадрид“ во Шпанија против домашниот натпреварувач Микел Мартинез (6:4, 6:2), Калин Ивановски денеска во осминафиналето оствари уште еден триумф.

Овојпат македонскиот тенисер успеа да го елиминира седмиот носител на турнирот Џон Ечеверија (Шпанија) со 2:0 во сетови 7:6 (9) и 7:5 за два часа и 14 минути игра.

За пласман во полуфиналето Ивановски ќе игра против првиот носител Николас Морено Де Алборан од САД кој беше подобар од Шпанецот Ромеро Де Авила со 6:1 и 6:4.

Мечот помеѓу Морено Де Алборан и Ивановски е закажан за в четврток од 13.00 часот.

Доколку нашиот најдоброрангиран тенисер на АТП биде подобар во овој двомеч, во полуфиналната фаза ќе игра против Жорда Санчис (Шпанија) или Питер Хелер (Германија).