Македонскиот одбојкар-интернационалец Љафтов: Горд сум што играм во италијанската Суперлига

Александар Љафтов оваа сезона настапува за екипат ана Равена/ фото: cel.eu

Нашиот репрезентативец сезонава настапува во италијанската Суперлига, најквалитетната одбојкарска национална лига на светот, за тимот од Равена. Александар ги сумира првите впечатоци и зборува за амбициите во првенството кое штотуку почна

Македонскиот репрезентативец Александар Љафтов сезонава ги брани боите на Порто Робур Коста од Равена, клуб што е дел од најсилната национална одбојкарска лига на светот, италијанската Суперлига.

Љафтов (31) е првиот Македонец кој заиграл во оваа лига, што многумина ја сметаат за најквалитетна. Тој е горд што настапува во оваа лига, што му е голема лична сатисфакција. Александар има богата интернационална кариера и многу трофеи со клубовите во кои досега настапувал, но италијанската лига му е досега највискиот дострел.

– За мене е огромна сатисфакција настапот во италијанската лига, но и мотивација за лично унапредување. Се надевам дека оваа сезона ќе ми биде успешна и дека ќе го дадам максимумот – вели Љафтов за својот најнов ангажман. Тој е се уште нов во оваа средина, сезонава се одиграни само две кола, но има први впечатоци.

– Италијанската лига сосема оправдано се смета за една од најсилните на светот. Тоа се гледа на секој натпревар, од организацијата, нивото и квалитетот на игра и борбата до последен поен – вели Александар, кој смета дека веќе се прилагодил на новата средина.

– Не ми е првпат да бидам во нова средина и многу брзо се „аклиматизирав“. Соиграчите се одлични момци, имаме и неколкумина странци. Веќе помина доволно време и мислам дека успеавме да се оформиме како целина – вели Александар. Неговиот клуб во првите две кола забележа два порази (со Пјаченца 1-3 и со Таранто 0-3), а главната цел во идниот период е тој почетен впечаток да се поправи.

– Оваа година целта е да се пласираме во средниот дел на табелата, но и да парираме на сите посилни екипи – вели Александар за амбициите на клубот кој има славна и долга традиција, но во поново време не е во италијанската елита. Равена е меѓу другото шесткратен шпампион на Италија, а последната круна ја освои во 1991 година. Равена е мал град во северниот дел на земјата во близина на јадранскиот брег и одбојката таму е популарна.

– Равена е помал град споредено со некои големи италијански градови, но тоа му дава посебна убавина. Се чувствува морската клима и навистина е релаксирано за живеење. Одбојката е многу популарен спорт во цела Италија, па и овде. Луѓето доаѓаат да не гледаат и не поддржуваат – вели Љафтов. Во неговиот тим има уште неколкумина балканци.

– Во тимот имаме уште тројца Балканци, Црногорец, Србин и Бугарин и со нив имаме повеќе заеднички работи. Но не би можел да ги одвојам ни останатите играчи – вели Александар. Неговата богата интернационална кариера го доведе во Равена од шампионот на Бугарија, Хебер Пазарџик. Претходно тој настапувал и во Хрватска, Турција, Србија, Египет… Италијанската лига ја сметаат за најквалитетно одбојкарско национално клупско натпреварување на светот, пред првенствата на Русија, Бразил, Турција…

 

Видео на денот