Македонски кандидати за Наградата за литература на ЕУ

Националното жири во состав: Елизабета Баковска (претседател), Ѓоко Здравески, Владимир Јанковски и Александар Саздов (членови), ја состави потесната листа на македонски кандидати за Наградата за литература на Европската Унија. Во конкуренција се авторите Давор Стојановски со „Утеха за голите“ (Или-Или), Ѓорѓи Крстевски со „Другата страна“ (Бегемот), Михајло Свидерски со „Последните денови на Ханс“ (Или-Или) и Петар Андоновски со „Страв од варвари“ (Или-или).

Наградата е наменета за автори што се сè уште на почетокот на кариерата во својата земја и тукушто ја почнуваат својата меѓународна кариера. Победникот од насловите што влегле во потесна конкуренција ќе биде објавен на 20 мај 2020 година.

Наградата за литература на Европската Унија e востановена во 2008 година и се доделува во 41 земја, кои се дел од програмата „Креативна Европа“. Досегашни македонски добитници на наградата се: Гоце Смилевски (2010), Лидија Димковска (2013) и Ненад Јолдески (2016).

(Текстот е објавен во „Културен печат“ број 28, во печатеното издание на „Слободен печат“ на 25-26 април 2020)

Видео на денот