„Македоника литера“ ја објави биографската книга „Леонардо да Винчи и неговото време“ од Атле Нес
Друштвото за издавачка дејност „Македоника литера“ ја објави биографската книга „Леонардо да Винчи и неговото време“ од норвешкиот писател Атле Нес. Во биографијата за Леонардо да Винчи, Атле Нес раскажува инспиративно, возбудливо и документирано за безграничната фантазија и генијалниот талент на Леонардо, за неговите ремек-дела, за скиците и цртежите, за кодираните белешки, за познати и малку познати нешта поврзани со неговото творештво и со неговата личност. Нес на импресивен начин го опишува необичниот животен пат на Леонардо, момче од најниските слоеви од местото Винчи кај Тоскана, до градењето на неговата кариера на популарен и култен уметник во Европа.
Леонардо да Винчи (1452 – 1519) е генијален уметник и пронаоѓач, највлијателен претставник на ренесансата, еден од најконтроверзните и мистериозните уметници во светот. Тој е сликар, вајар, архитект, инженер, анатом, астроном, ботаничар…, сестран талент и голем гениј – но и голема мистерија. Сè уште е предизвик за многу истражувачи на неговото дело и неговиот творечки пат. Атле Нес одблиску на читателите им го покажува човекот скриен зад митот за творецот и историскиот контекст во кој се создадени ремек-делата на Леонардо.
Биографијата има монографска форма. Илустрирана е со голем број цртежи, слики и скици на пронајдоци на Леонардо да Винчи, а еден дел на крајот е печатен во боја, во кој се сместени репродукции на најпознатите дела на уметникот. Преводот е на Ленче Тосева и Елена Саздовска. Атле Нес (1949) е писател, историчар и историчар на уметноста. Автор е на биографии за Леонардо да Винчи, Галилео Галилеј, Едвард Мунк и Хенрик Ибзен.
(Текстот е објавен во „Културен печат“ број 84, во печатеното издание на „Слободен печат“ на 12-13 јуни 2021)