Македонија во баражот за СП, ракометарките ја победија и Литванија
Денеска во вториот натпревар од квалификациите за учество во баражот за Светското првенство нашата најдобра женска ракометна репрезентација триумфираше и над Литванија убедливо со резултат 31:21.
Со денешната втора победа во квалификациската група „2“ и вчерашната стартна над Исланд, Македонија практично го обезбеди настапот во мундијалскиот бараж.
Литванките го имаа само почетното водство од 0:1, во наредниот период се играше гол за гол, а при 4:4 се одвоивме на „плус два“ со двата голови на Стојковска во осмата минута од средбата.
Не се предаваа гостинките кои се доближија на „минус еден“ (9:8), но следуваше низа на погодоци на домашната селекција, вкупно пет за 14:8 на семафорот. До паузата половина од таа позитива се стопи и после првиот дел водевме со 15:12.
При водство од 19:16 во второто полувреме (42 мин.) „црвено-жолтите“ направија серија од 10:3 со што беше клучно и за целосно кршење на отпорот на противникот и само се чекаше крајот на натпреварот.
Најрасположена за голови беше Ристовска која забележа осум, ја следеше Стојковска со пет, а по четири имаа Боризовска и Ѓорѓиевска.
Останува избраничките на селекторот Симе Симовски да го докажат својот квалитет и потенцијал и во текот на утрешниот меч во СЦ „Борис Трајковски“ – Скопје, кога во истиот термин од 17.00 часот ќе се соочат со грчката селекција за потврда на првото место во групата.