Денеска во Виена се одржа извлекувањето на двојките за баражот за Светското Првенство што од 14-31 јануари 2021 година ќе се игра во Египет. Македонија, како дел од вториот шешир во извлекувањето, за противник во баражот ја доби селекцијата на Франција.

Првиот меч од баражот ќе се игра во Скопје во периодот од 05 до 07 јуни, додека реваншот на теренот на ривалите ќе се одигра во периодот од 09 до 11 јуни 2020 година.

Традиционално Французите се секогаш едни од кандидатите за највисок пласман на големите натпреварувања. Тие имаат најмногу златни медали од светските шампионати, вкупно шест, на СП 2019 го освоија бронзениот медал.

На последниот евро шампионат 2020 „триколорите“ имаа неочекувано слаби перформанси и го освоија дури 14. место, веднаш пред нас во конечниот генерален пласман. Но, секако не се заборава фактот дека трипати беа европски шампиони.

На СП во Египет, покрај организаторот и актуелниот шампион Данска, пласман веќе имаат обезбедено: Хрватска, Норвешка, Шпанија, Алжир, Ангола, Капе Верде, Конго, Мароко, Тунис, Бахреин, Јапонија, Катар, Јужна Кореја, Аргентина, Бразил и Уругвај.

Мундијалот ќе се игра во пет градови: Каиро, Шарм Ел Шеик, Хургада, Суез и Луксор. Ќе настапат вкупно 32 репрезентации поделени во осум групи по четири репрезентации, а предвидено е да се игра во периодот од 14 до 31 јануари 2021 година.