Најдобрата македонска репрезентација во својот прв натпревар на Медитеранските игри во Оран, Алжир, триумфираше убедливо над Грција со 39:21.

До 18 минута се играше гол за гол, а при нерешени 10:10 избраниците на селекторот Кирил Лазаров до крајот на првиот дел направија серија од 9:1 што беше клучно за освојување на првите бодови.

Предноста растеше во вториот дел, најголемата позитива изнесуваше пред самиот крај на мечот, на семафорот стоеше „плус 19“ за нашата селекција (39:20).

Лазаров им даде шанса на сите играчи, Серафимов беше најефикасен со седум голови, шест имаше Џонов, по пет Костески и Атанасијевиќ, а четири беа делона Ѓоргиев.

Во нашата група „Б“ домаќинот Алжир исто така имаше победнички старт, славеше против Турција со 32:27, а слободна беше селекцијата на Шпанија.

Следното второ коло ќе се игра в среда, Македонија ќе игра против Алжир, селекцијата на Шпанија за ривал ја има Турција, а слободни се Грците.

Во другата група „А“, Србија со 31:27 славеше над Словенија, додека Египет со 38:35 беше подобар од Италија. Слободна беше репрезентацијата на Тунис.