Откако денес на прес-конференција министерот за здравство Венко Филпче потврди дека во Македонија е регистриран првиот случај на новиот коронавирус, во некои од скопските маркети може да се забележи засилена фрекфенција и зголемен број на купувачи.

„Луѓето купуваат брашно, масло, сапуни, влажни марамици, конзерви, тестенини, тоалетна хартија, зимница, средства за чистење. Рафтовите беа речиси празни“, вели читател на „Слободен печат“, кој ни испрати фотографија од еден скопски маркет.

– Наеднаш сите огладнеа, не знам што се случува – се запрашал продавачот, кој бил затекнат од големиот и невообичаен метеж.

Нема потреба од паника! Рамстор во моментов pic.twitter.com/eaEK24AlCF

— лилипутанка (@BojankaS) February 26, 2020

Поради состојбата со новиот вирус, многу од родителите не се сигурни дали да ги пуштат своите деца утре на училиште. Министерството за здравство вчера објави телефонски броеви на кои јавноста може да се информира и да пријави сомнителни случаи на коронавирусот, а родителите на истите можат да добијат подетални информации од стручните лица.

Претходно денес, во скопските аптеки имаше интензивна побарувачка на медицински маски. „Слободен печат“ информираше дека граѓаните купуваат по неколку пара, и за себе и за најблиските.

„Слободен печат“ денес ги праша и македонските граѓани дали тие стравуваат од новиот коронавирус, како и тоа дали се задоволни од преземените мерки на Владата и што би презеле тие самите доколку се појават случаи на заболени во нашата држава. Нивните одговори погледнете ги во видеото: