Мајски оперски вечери онлајн: Оперски крстопат на цивилизации и култури
Најзначајниот фестивал на Националната опера и балет, Мајски оперски вечери, годинава ќе се одржи во традиционалниот термин од 9 до 31 мај, но ќе биде реализиран во онлајн-верзија. Фестивалот ќе биде отворен на 9 мај со дигиталната премиера на најновата продукција на операта „Кармен“, на 12 мај ќе биде прикажана балетската претстава „Рајмонда“, на 15 мај „Турандот“, на 17 мај „Кавалерија Рустикана“ и оперскиот концерт по повод 70 години од оперската уметност.
На 19 мај ќе може да се проследи балетскиот концерт „Балетски бисери“, а на 22 мај операта „Фауст“. На 24 мај, по повод празникот Св. Кирил и Методиј, на програма ќе биде операта „Лидија од Македонија“ од Ристо Аврамовски. Операта „Адријана Лекуврер“ ќе биде емитувана на 26 мај, а операта „Травијата“ на 29 мај. Традиционално, на 31 мај ќе се емитува операта „Аида“.
Директорот на Националната опера и балет м-р Васо Ристов вели дека Мајските оперски вечери се крстопат на цивилизации и култури од целиот свет, но, пандемијата ги променила сите планови што ги имале за 48. Мајски оперски вечери.
На официјалниот Јутјуб-канал на Националната опера и балет ќе може да се проследат 10 продукции, осум оперски и две балетски.
– Ова е период од годината кога ние, вработените во Националната опера и балет, сме секогаш најпродуктивни и во зенитот на нашата оперска и балетска сезона. За нас, 9 мај е најочекуваниот ден во годината, ден до кој доаѓаме по период исполнет со макотрпна работа, труд, но и возбуда поради тоа што не очекува во текот на месецот. Нам уметниците, оваа година ќе ни недостига чувството на исполнетост, креативен порив и адреналинот кој го чувствуваме додека сме на сцена за време на нашите претстави. Верувам дека сите емотивно го доживуваме овој период и со нетрпение очекуваме да се вратиме на нашите работни места.
Сите ние кои се занимаваме со музика знаеме дека ја имаме најубавата работа на светот. И бидејќи постоиме за вас, нашата верна публика, сега од вас ја бараме најголемата поддршка. Во месец мај споделувајте ги линковите од нашите претстави и не нѐ заборавајте. А на сите вас кои некогаш сте настапиле на Мајските оперски вечери или сте учествувале во некој нашите проекти, ви се заблагодаруваме на поддршката, вели Уметничкиот раководител на операта, м-р Бисера Чадловска.
(Текстот е објавен во „Културен печат“ број 30, во печатеното издание на „Слободен печат“ на 9-10 мај 2020)