Мајката која се породи додека беше на респиратор, го победи коронавирусот (ФОТО)
Мајка од Охајо, која се породи додека беше на респиратор, го победи коронавирусот. Меган Сајтс (27) била бремена во седмиот месец со своето второ дете кога итно била префрлена во болницата на први април, бидејќи имала тешкотии во дишењето, пренесува „Дејли мејл“.
Со тестирањето бил откриен коронавирус во нејзините бели дробови и била ставена на респиратор во будна состојба. Таа рекла дека можела да ја почувствува цевката како влегува во душникот.
Подоцна била пренесена во друга болница, во Дејтон, а бидејќи накратко се подобрила нејзината состојба, лекарите ја тргнале од респираторот. Но тогаш дошло до нагло влошување.
– За 48 часа, мојата состојба потполно се влоши – вели Меган.
Таа не можела да ги види ниту сопругот Дони, ќерката, родителите, роднините или пријателите, поради рестрикциите во болницата заради пандемијата.
– Имав моменти на нервен слом. Си реков дека тоа е тоа, дека нема да успеам. Сè ме болеше во телото, дишењето беше болно, движењата, кашлањето – раскажува Меган.
Таа побарала од болничкиот персонал повторно да ја стават на респиратор, но овој пат додека спие.
Лекарите на 8 април го известиле нејзиниот сопруг дека респираторот би можел да ѝ помогне на Меган за да ја истера бременоста до 30-та недела. Меѓутоа, 20 минути подоцна, Дони бил повикан од лекарите за да го известат дека белите дробови на Меган откажуваат. Лекарите рекле дека мора да ја породат следниот ден за да ја спасат.
Меган била подложена на процедура на екстракорпорално одржување во живот, т.н. екстракорпорална мембранска оксигенација (ECMO) што според анестезиологот на „УС Хелт“, д-р Сузан Бенет е „речиси последно средство“. Ова значи дека таа била ставена на машина што привремено ги заменува срцето и белите дробови. „УС Хелт“ никогаш не ставил бремена жена на машина ECMO, но Меган била добар кандидат.
Таа потоа заедно со апаратот била пренесена со хеликоптер во болницата „Мајами вели“ во Дејтон, каде бил направен царски рез, по 29 недели и шест дена бременост. Родила момче, кое е сместено на одделението за неонатална интензивна нега.
Кога Меган се разбудила, не се сеќавала дека се породила бидејќи спиела.
- Оттогаш имав многу халуцинации, но на самиот третман ЕСМО. Вистинско чудо е што воопшто седам тука и разговарам со вас. Немам зборови, нема начин на кој можам да им се заблагодарам како што заслужуваат. Ова е надреално – вели Меган.
По 10 дена, Меган конечно можела да го запознае својот новороден син Џејмсон, кој сè уште е во болницата. Лекарите велат дека бебето е здраво и дека нема знаци на инфекција со ковид-19, па ќе го пуштат дома за четири до пет недели.