„Маѓар Телеком“: За „пријателите од Тетово“ и за „страната А“ исплатени вкупно 7,5 милиони евра
Денеска со ново судско рочиште продолжи судењето за случајот „Маѓар Телеком“, на кое како сведок се појави поранешниот министер за транспорт и врски од ДУИ, Џемали Мехази, кој скоро еден час одговараше на прашањата на обвинителката Лиле Стефанова.
Обвинителката на сведокот му посочи документи, протокол за соработка меѓу македонската влада и „Матав-Маѓар“ и нон-пејпер од 2005 година, на кои стои ознака „доверливо“, а СЈО ги добило директно од Америиканската комисија за хартии од вредност.
Според овие документи „Матав-Маѓар“ ќе ѝ исплати 2,5 милиони евра на „страната А“, за која е назначено дека е Владо Бучковски, како и 5 милиони евра на „пријателите од Тетово“ со иницијали А.А. и М.Џ. Стефанова потенцираше дека во нон-пејперот стои и динамиката со која треба да се реализира протоколот односно исплатата на парите била на 3 рати. 2,5 милиони на денот на потпишувањето, а следните две рати од по 2,5 милиони евра биле исплатени на 30 декември 2005 година и јуни 2006 година.
Поранешниот министер Мехази рече дека потписот на протоколот е негов, но дека не се сќеава на деталите, затоа што не учествувал во подготвувањето на документот, туку само го потпишал. Тој исто така не знаеше дали Договорот за соработка е заведен во деловодните книги на Министерството за транспорт и врски, оти како што рече поминало многу време. Како сведок исто така треба да се појави и Михалис Кефалојанис до кого е испратена замолница на која сѐ уште нема одговор. На наредното рочиште кое судијката Ленка Давиткова го закажа за 27 март треба да сведочат двајца сведоци, а еден од нив е поранешниот разузнавач Слободан Богоевски.
Поранешниот директорт на „Македонски телеком“ Атила Сендреи и членовите на тогашниот Одбор на директори Ролф Плат, Михаил Кефалијанис и Золтан Кишјакус, се обвинети дека склучувале фиктивни договори за консултантски услуги со кипарската консултантска куќа „Чаптекс холдингс лимитид“ и на тој начин го оштетиле „Македонски телеком“ за речиси 4 милиони евра, а и Буџетот на Р.М. за 2 милиони евра, бидејќи Владата во тој период поседуваше 47% од акциите во компанијата. На сметка на фирмата во Кипар биле префрлани пари без одлука на Одборот на директори, а налозите ги потпишувале Сендреи, Плат и Кишјакус.
Обвинението против тројцата ексдиректори било поднесено во Основниот суд Скопје 1 во првата половина на 2011 година, а првото судење се одржа на 26 октомври 2011 година. Судот распиша меѓународна потерница во 2008 година за Атила Сендреи, Ролф Плат и Золтан Кишјакус. Михалис Кефалојанис нема да одговара за овој случај, бидејќи обвинителот Марко Зврлевски за него ја отфрлил кривичната пријава.