Магични приказни: Неверојатни размисли за моќта на спомените
Издавачкиот центар „Три“, во рамките на едицијата „Магични приказни“, ја објави книгата „Крајот на осаменоста“ од Бенедикт Велс. Преводот на македонски јазик е на Катерина Јосифоска, а едицијата е поддржана од Програмата „Креативна Европа“ на Европската Унија.
Во трогателниот и речиси беспрекорно напишан роман „Крајот на осаменоста“ Велс ткае тридецениска семејна историја низ неверојатни размисли за моќта на спомените во човековиот живот, за сличностите и различностите, за пријателството, љубовта и сочувството. Романот нѐ води низ драматичниот живот на двајца браќа и една сестра, кои ги губат родителите во автомобилска несреќа и ги поминуваат детството и младоста со чувство на напуштеност и отуѓеност. Дури и кога ќе пораснат, секогаш одново болно се навраќаат на минатото, кое го оставило својот суров печат врз нивните животи. Оваа калеидоскопска семејна сага е истовремено и закрепнувачка љубовна приказна и ода за пријателството.
Бенедикт Велс е современ германско-швајцарски писател, кој уште со објавувањето на својот прв роман ги освои и публиката и критичарите, ги доби најзначајните книжевни награди и стана еден од најпреведуваните автори од германски јазик. Досега ги објавил романите „Последното лето на Бек“, „Откачен“ и „Речиси генијално“. Неговиот четврти роман „Крајот на осаменоста“ е преведен на 34 јазици, а во 2016 година ја доби Наградата за литература на Европската Унија, како и наградата на Фондацијата „Равенсбургер“ за најдобар семеен роман. Во 2018 година ја освои и наградата „Еурегио“.
(Текстот е објавен во „Културен печат“ број 33, во печатеното издание на „Слободен печат“ на 30-31 мај 2020)