Магичната димензија на бројот 100
Бројот 100 има некоја магична димензија. Во човековиот живот „да се доживее стотата“ значи долговечност. Прослава на стогодишен јубилеј е чин со огромно значење во секоја област. Во однос на стотиот број на неделен прилог за култура, работите не се толку драматични, но во ситуација кога речиси сите редакции за култура се згаснати или трансформирани, кога културата најчесто се третира ефемерно, на маргините на другите настани, од особено значење, барем за нас, е создавањето и двегодишното опстојување на „Културен печат“ како прилог за култура во дневниот весник „Слободен печат“, бидејќи други такви примери, речиси, и да нема.
Благодарение на професионалниот усет на менаџментот и уредништвото на „Слободен печат“, вредните раце на графичката дизајнерка Елисавета Бејкова и лекторката Виолета Караџовска-Стојанова, но најмногу на прифаќањето и фантастичниот одзив на читателската публика и уметничката фела, „Културен печат“ стигна до својот 100-ти број. Заедно продолжуваме понатаму!