Моден перформанс #sustainablestorymk

59
Фото - Баже Ангеловски

Во организација на Моден викенд Скопје и Македонско модно здружение се одржа модниот перформанс наречен #Sustainablestorymk – Наши први експресии, во Астибо фешн груп – АФГ во Штип.

На капсулните колекции направени од текстилен отпад работеа Емануела Трајческа, Сара Реџиќ, Ева Зарезанкова, Натали Наумова, Радица Лазова, Катерина Димитровска, Мирјана Јосифоска и Дана Ќосева под менторство на дизајнерката Ирина Тошева.

– Дизајнот од нула отпад всушност не е нова технологија или материјал. Тоа е нов начин на размислување – филозофија која те тера да ги оспориш постоечките техники и да станеш покреативен дизајнер. Поставувањето на различни парчиња облека како сложувалка со различни техники придонесува да нема ткаенина која е залудно потрошена, а добивате ново уникатно парче кое повторно може да се носи. Освен заштитата на животната средина на овој начин добивме и нови убави форми на модата – велат организаторите.

Модниот перформанс е дел од проектот „Модата како дел од екосистемот. Одржлива приказна“. Во следната фаза учесниците ќе ги менторираат и гостите од Британија, односно талентираната дизајнерка Ана Скодбо и една од водечките британски стилистки Ребека Рој.

Иницијативата започна во септември годинава, со континуирани активности. Завршницата ќе се случи во ноември, 2018 во рамките на Моден викенд Скопје. Проектот го реализираат Моден викенд Скопје и Македонско модно здружение во соработка со Министерството за економија, со поддршка од Министерството за култура во рамките на манифестацијата „Нов културен бран 2018“ и Британскиот совет.