И покрај опасноста која ја предизвикува пандемијата од корона вирусот, претседателот на Белорусија, Александар Лукашенко, не отстапува од планираното одржување на свечената парада закажана за 9. мај во знак на Денот на победата над фашизмот во Втората светска војна.

– Морам да кажам дека не можеме да ја откажеме парадата – едноставно не можеме. Размислував долго на оваа тема. Секако, тоа е емоционална и длабока идеолошка работа, изјави Лукашенко пред неколку дена пред претставниците на владата на Белорусија.

Иако бројот на заразени од корона вирусот во земјата расте, Лукашенко настојува таа опасност да ја намали, игнорирајќи ги при тоа препораките за социјално дистанцирање и другите превентивни мерки, а реакцијата на другите земји на пандемијата ја нарече „корона психоза“, пренесува „Радио Слободна Европа“.

-Подобро е да умреш стоејќи отколку да живееш на колена, истакнал Лукашенко, порачувајќи со тоа дека и покрај пандемијата нема да дојде до целосно затворање на земјата.

Сепак, останува да се види од колкави размери ќе биде утрешната парада во Минск и дали ќе биде дозволено присуство на гледачи, но според зборовите на Лукашенко, на воените ветерани им било препорачано да не присуствуваат на случувањето.

А покрај Белорусија, Туркменистан е единствена поранешна советска република во која Денот на победата ќе биде одбележан со парада.