Директорката на Управата за јавни приходи (УЈП), Сања Лукаревска вечерва посочи дека компаниите немаат никаква можност да не ја исплатат државната помош за исплата на минимална плата, како поддршка за полесно справување со последиците предизвикани од коронавирусот.

Таа во гостувањето на ТВ21 рече дека секој месец има компании кои ги злоупотребуваат финансиските средства од Владата, и покрај апелите што ги посочуваат. Додаде дека доколку не се исполнети критериумите од ова земање на државната помош, ќе се спроведуваат соодветни дејствија на присилна наплата.

– Во самата уредба, а сега и во Законот,точно е наведено во кои услови, ако не се исполнети критериумите од ова земање на државната помош, ќе се спроведуваат соодветни дејствија на присилна наплата, а исто така ќе треба да се прави и соодветно враќање на средствата. Постојано апелираме да нема злоупотреба, меѓутоа секој месец гледаме дека сепак има одредени компании кои сакаат да направат злоупотреба, рече директорката.

Лукаревска појасни дека УЈП, под лупа го има работењето на фирмите за кои постои сомневање дека во изминатите години не исплатиле минимална плата или барале одредена сума да им биде вратена од работниците.

Како што посочи, се испитува работењето на овие фирми и во однос на нивната даночна дисциплина.