Лукаку: Конте ми кажа дека сум ѓубре
Напаѓачот на Интер истакна дека тренерот го мотивира да го даде најдобро од себе на секој натпревар.
Ромелу Лукаку за време на летниот преоден рок пристигна во Интер од Манчестер јунајтед и е најзаслужен што „нероаѕурите“ се главен конкурент на Јувентус за титулата во Серија А.
Белгиецот досега во дресот на Интер постигна 18 голови на 26 натпревари, и открива дека за одличните игри најзаслужен е тренерот Антонио Конте.
– На еден од првите натпревари во Лигата на шампионите, против Славија Прага одиграв многу слабо. Тогаш Конте пред останатите фудбалери ми кажа дека сум ѓубре.
Исто така ми кажа дека ќе ме извади од игра по пет минути доколку продолжам да играм лошо. Следниот дуел го игравме против Милан и тоа беше еден од моите најдобри натпревари.
Конте како да ме разбуди, тој може да го направи тоа бидејќи кај него сите се еднакви. Конте се што треба ќе ви каже директно во лице – изјави Лукаку.