Лука е фантастичен, тој е господин трипл-дабл
Лука Дончиќ продолжува да ги импресионира и фановите и експертите во НБА лигата. Словенецот беше прогласен за играч на месецот во Западната конференција, а веќе во втората сезона во најдобрата кошаркарска лига, тој соборува рекорди.
Во последната победа на Далас над Њу Орленас од 130:84 Дончиќ имаше учинок од 26 поени, 8 асистенции и 6 скокови со што успеа да го надмине Леброн Џејмс во едно постигнување и да се израмни со најобриот кошаркар во историјата, Мајкл Џордан.
Лука е првиот кошаркар од 1976 година кој заедно со Џордан и со Оскар Робертсон, на најмалку 18 натпревари по ред постигнувал по минимум 20 поени и по пет асистенции и скокови. Словенецот зад себе ги остави Леброн Џејмс и Расел Вестбрук кои ваков учинок имаат на 15 натпревари во низа.
Дончиќ сезонава просечно остварува по 30.1 поен, 10 скокови и 9.2 асистенции и веќе добива признанија за фантастичните игри. Последен кој му оддаде почит е поранешниот кошаркар на Далас маверикс, Дерек Харпер.
– Лука е фантастичен цела сезона, има неверојатна контрола на топката, поентира и од рекетот и надвор од него. Тој е господин трипл-дабл со неверојатно многу офанзивни оружја и не гледам начин како да биде запрен – вели Харпер кој ги коментира натпреварите токму на Далас и има одличен увид во играта на Словенецот.