Музичкото дуо составено од Драган Спасов-Дац и Александар Митевски одлучија да направат мало изненадување и да го разубават и размрдаат седењето дома, па така, за вечерва во 20 часот најавија вклучување во живо од нивната фејсбук фан-страна. Како што сподели дуото, подготвуваат мала музичко-забавна програма која ќе се одвива во студио Скендеровски. Седенката на која ќе се пее, зборува и едуцира за музиката, ќе биде достапна во живо на јутјуб и фејсбук.

„Со сет од наши и ваши омилени песни, ќе промуабетиме за интересни нешта, а низ програмата домаќин ќе ни биде Бојана Скендеровски. Ќе ве потсетиме на препораките од Министерството за здравство, а со нашата музика „ќе дојдеме на гости“ во сите Ваши домови. Бидете со нас!“ порачаа тие.

Пред неколку дена, Дац, Александар Митевски и Наташа Скендеровски преку подарок песна, им се заблагодарија на сите херои на денешницата кои се вклучени во борбата со актуелниот коронавриус. Станува збор за преработка на македонската песна „Љуби ме и главата горе“ која доби и интересен видео запис, преку кој им се оддава почит на сите медицински лица, Армијата, Црвениот крст и сите други институции кои го жртвуваат својот живот за да помогнат во борбата со вирусот.