ЛШ: Пеналите среќни за Адеми и Динамо, чудо на „Селтик парк“! (ВИДЕО)
Денеска на програмата беа натпреварите од второто квалификациско коло во Лигата на шампионите во кое имаше неколку изненадувања. Селтик на домашен терен е елиминиран од Ференцварош (1:2), за Унгарците водство донесе Сигер во седмата минута, израмнија Шкотите преку Кристи, а конечниот епилог во контра напад го постави Нгуен во 75 минута на „Селтик парк“.
Потоа, полската Легија ги разочара своите навивачи откако со 0:2 загуби од кипарската Омонија. Напомена дека домаќините беа со играч помалку од 56 минута поради двата жолти картони на Левчук. После регуларниот дел мируваа мрежите, но затоа во продолженијата гостите дојдоа до победата со погодоците на Гомез и Сантош.
Динамо Загреб дури во пенал серијата успеа да триумфира над Клуж во Романија. Гојак во четвртата минута стрелаше за предност на Хрватите кои од 51 минута останаа со играч помалку поради црвениот картон Теофил-Катерин. Во следната минута Романците не реализираа пенал преку Деак, но затоа во 54 минута израмнија со голот на Переира. Кастрати ги врати „модрите“ во позитива во 78 минута, а во самиот финиш од средбата Дебељух (90+3`) стрелаше за нов егал.
Немаше погодоци во двете продолженија, победникот го дознавме преку пеналите во која славеше Динамо 6:5, а свој придонес кон успехот имаше и македонскиот репрезентативец Аријан Адеми кој беше прецизен од белата точка во третата серија. Сараево од БиХ претрпе пораз во Белорусија од Динамо Брест 2:1, а нашиот Крсте Велкоски од клупата за резерви ја гледаше елиминацијата на својот клуб.
Во другите натпревари од 2. квалификациско коло на ЛШ: АЗ Алкмар-Плзењ (1:1, 3:1) по продолженијата, Целје-Молде 1:2, Карабах-Шериф Тираспол 2:1, Судува-Макаби Тел Авив 0:3, Локомотива Загреб-Рапид Виена 0:1, Лудогорец-Митјиланд 0:1, Јанг Бојс-Клаксвик 3:1.