Во првиот натпревар од групата Ц во својата дебитантска сезона во Лигата на шампионите, Еурофарм Работник загуби минимално со 29:30 од Спортинг.

Во салата „Боро Чурлевски“ се играше една рамноправна битка на паркетот во која што немаше да биде незаслужено доколку и тимот на Стевче Алушовски триумфираше на крајот. Спортинг беше максимално ефикасен од линијата за седум метри (6/6), но не и македонскиот претставник кој имаше учинок 2/4, па така тие два нереализирани пенали на крајот го чинеа и пораз.

Во првото полувреме водеше нашата екипа со 6:4 во 10 минута, па со 13:11 во 23 минута. Беше неизвесно на резултатски план до 39 минута кога беше нерешено 20:20, но потоа се дозволи ривалот да направи серија од 4:1 што се покажа и како клучно за крајниот епилог.

Кај домаќините по пет голови имаат Ловро Јотиќ и Владислав Остроушко, а по четири Невен Стјепановиќ и Олександр Шевелев. На спротивната страна 10 погодоци беа дело на Мариан Валентин Јонеа, а пет помалку запиша Карлос Пасарин Руесга.

Во наредното второ коло Еурофарм Работник на 18 септември ќе гостува во Шведска кај Савехоф (19.00 часот).