Денеска во рамките од второто коло во Лигата на шампионите составот на Порто ја забележа првата победа сезонава на домашен терен совладувајќи го Мешков Брест со 27:25.

Одличен во редовите на португалскиот клуб беше македонскиот голман Никола Митревски со 13 одбрани. Кај стрелците во победничките редови Соареш имаше пет голови, а на спротивната страна за белорускиот претставник Паниќ запиша девет голови.

ПСЖ кој и сезонава е еден од главните кандидати за шампионскиот трофеј, изненадувачки на домашен терен со 28:29 загуби од Фленсбург.

Иако после првото полувреме бундеслигашот имаше негатива од четири разлика (18:14), успеа да направи целосен пресврт и триумфира над екипата предводена од нашиот поранешен селектор Раул Гонзалез.

Во останатите два меча од денешната програма, Алборг убедливо славеше над Мотор Запорожје (38:29), а Кјелце со 26:23 беше подобар од Пик Сегед.